नेपालगञ्जपाटी समाचार
नेपालगञ्ज, फागुन ८ । नेपालगञ्जमा आइतवार विहान एक विद्यार्थिको मोबाइल लुटिएको छ । बाँके प्रहरी तस्कर विरुद्ध सक्रिय रहेको मौका छोपेर लुटपाट गर्नेहरु पनि सक्रिय भएको सो घट्नाले पुष्टि गरेको छ ।
नेपालगञ्जको आदर्श सेकेन्डेरी स्कुल कक्षा ११ मा अध्ययनरत एक विद्यार्थी बिद्यालय जाने क्रममा आइतबार बिहानै सडकमै लुटिएका हुन । मोटरसाइकलमा आएका दुईजना लुटेराले उनको मोबाइल लुटेर लगेका हुन ।
उक्त स्कुलमा पढ्ने नेपालगञ्ज उपमहानगरपालिका वडा नम्बर १२ मुक्तिपुर बस्ने १७ बर्षिय प्रशान्त थापाको ‘रियल मि सी ३’ मोबाइल लुटिएको हो ।
भे ४ प ५४५८ नम्बरको कालो रंगको स्प्लेन्डर मोटरसाइकलमा आएका दुईजना लुटेराले आइतबार बिहान ६ बजेको समयमा न्यूरोडको भानुभक्त चोक नजिकबाट आफुलाई रोकेर हातपात गरी मोबाइल लुटेर भागेको विद्यार्थी थापाले बताउनुभयो ।
लुटेराहरुसङ्ग आफ्नो मोबाइल खोस्ने क्रममा थापा घाइते भएका छन । मोबाइल खोस्न लाग्दा मोटरसाइकलबाट आफुलाई धकेलेर सडकमा पल्टाएर उनिहरु भागेको उहाँले बताउनुभयो । धकेलिएर सडकमा पल्टिदा उनको अनुहार र हातमा चोटपटक लागेको छ । लुटेराका विरुद्ध प्रहरीमा उजुरी गरिएको छ ।
मोबाइल लुट्ने लुटेराविरुद्ध प्रहरीमा उजुरी परेको जिल्ला प्रहरी कार्यालय बाँकले जनाएको छ । लुटेराहरुको खोजिमा प्रहरी परिचालन गरिएको सो कार्यालयले जनाएको छ । घाइते विद्यार्थीको भेरी अस्पतालमा उपचार गरिएको थियो ।
पछिल्लो समयमा नेपालगञ्जमा चोरी तथा लुटपाटका घटनाहरुमा वृद्धि भएको देखिन्छ । जसमध्ये, मोटरसाइकल चोरीका घटना अत्याधिक बढेको छ । चोरी तथा लुटपाटमा अधिकाँस लागूऔषध सेवन गर्ने व्यक्तिहरू संलग्न हुने गरेको पाइएको छ ।