नेपालगञ्जपाटी समाचार
नेपालगञ्ज, जेठ १० । खजुरा गाँउपालिकाको पहिलो बैठकले पालिकाले वितरण गर्दै आएको सामाजिक सुरक्षा भत्ता वडा कार्यालयबाटै वितरण गर्ने निर्णय गरेको छ । सो बैठले पालिकाबाट बुझ्दै आएको सामाजिक सुरक्षा भत्ता बेंकहरुको समन्वयमा वडा कार्यालयबाटै वितरण गर्ने निर्णय गरेको खजुराका नवनिर्वाचित अध्यक्ष डम्बर विक तुफानले बताउनुभयो ।
बैठकले दिर्घरोगी र जेष्ठ नागरिकहरुको स्वास्थ्य परिक्षण निशुल्क र घरघरमै पुगेर गर्ने निर्णय गरेको पनि उहाँले जानकारी दिनुभयो । अध्यक्ष तुफानका अनुसार बैठकले खजुरामा अभिभावक बिहिन बालबालिकाको पहिचान गर्ने र गाँउपालिकाले उनीहरुको अभिभावकत्व ग्रहण गर्ने पनि निर्णय गरेको छ । शहरिकण बढेसँगै गाँउपालिकामा फोहोर व्यवस्थापनको समस्या देखिन थालेको भन्दै बैठकले गाउँपालिकाका प्रवक्ता धनिराम ओलीको संयोजकत्वमा फोहर व्यवस्थापनका लागि ल्याण्डफिल साईडको जग्गा खोजि गर्न समिति समेत गठन गरेको छ ।
सोही पहिलो बैठकले वडा नम्बर २ का वडा अध्यक्ष धनिराम ओलीलाई गाँउपालिकाको प्रवक्तामा नियुक्त गरेको छ । स्थानीय तह निर्वाचनमा एमालेका सुमन मल्ललाई हराउँदै १०७९० मतका साथ गठबन्धनबाट माओवादीका उम्मेदवार डम्बर विक तुफान अध्यक्षमा र १००३४ मत सहित कांग्रेस उम्मेदवार मन्जु मल्ल उपाध्यक्षमा विजयी भएपछि पालिकाको पहिलो बैठक सोमबार बसेको थियो ।
नवनिर्वाचित अध्यक्ष तुफानले यी निर्णयसंगै घोषणापत्रमा उल्लेख भएका सबै बुँदाहरुलाई क्रमशः पुरा गर्दै लगिने पनि जानकारी गराउनु भएको छ । उहाँले विकास निर्माण र सेवा सुविधामा कुनैपनि भेदभाव नगरिने तथा राजनितिक विचारधारा भन्दा माथि उठेर जनताको सेवा गरिने बताउनुभयो ।
यो खबर पढेर तपाईलाई कस्तो महसुस भयो ?
+1
1
+1
+1
+1
+1
+1
+1
3