दियो बाल्ने क्रममा सावधानी नअपनाउँदा आगलागी, ५ लाखको क्षति

नेपालगञ्जपाटी समाचार
नेपालगञ्ज, १९ कात्तिक । सावधानी नअपनाउँदा लक्ष्मी पुजा गर्ने क्रममा नेपालगञ्जको धम्बोझीमा विहिबार राती आगलागी भएको छ । दियो बाल्ने क्रममा गरिएको बेवास्ता र लापरवाहीले गर्दा नेपालगन्ज–१ धम्बोझीस्थित शिव मन्दिर नजिक रहेको चन्दा काँदुको घरमा राती साढे नौ बजे आगलागी भएको हो ।
प्रहरीले दिएको जानकारी अनुसार काँदुको एक तले पक्की घरमा आगलागी हुँदा करिव एक लाख जति नगद र पाँच लाख रुपैयाँ बराबरको धनमाल क्षति भएको छ । काँदुको घरमा डेरा गरी बस्ने आदित्य वर्नवालले लक्ष्मी पूजा गर्न बालेको दियोबाट आगलागी सुरु भएको जिल्ला प्रहरी कार्यालय बाँकेका प्रवक्ता डीएसपी मधुसुदन न्यौपानेले बताउनुभयो । उहाँले प्रहरीले पटक पटक होसियार भएर पर्व मनाउन आग्रह गरेपनि बेवास्ता गरिएपछि क्षति व्यहोर्नु परेको जनाउनुभयो ।
लक्ष्मी पुजा गर्ने क्रममा आगलागी भएपछि तत्कालै दमकल र प्रहरी पुगेर आगो निभाईएको थियो । सो कार्यमा नेपालगन्ज उपमहानगरपालिकाको दमकल, जिप्रका बाँकेको वाटर क्यानन भेइकल, प्रहरी र स्थानीयको सहभागिता रहेको प्रहरीले जनाएको छ ।
यसैगरि पटाका पड्काउने क्रममा पनि आधा दर्जनजतिको हातमा सामान्य चोट लागेको जानकारी आएको प्रहरीले जनाएको छ ।