सामुदायीक वनबाट अवैध रुपमा काटिएको ५० क्युफिट काठ बरामद

नेपालगञ्जपाटी समाचार
नेपालगञ्ज, माघ २५ । विभिन्न प्रकारका अवैध चोरी पैठारी र तस्करीका घट्नाहरु हुने गरेको बाँकेमा अवैध काठ कटान र काठ तस्करी पनि बढेको पाईएको छ । पछिल्लो समयमा आएर बाँके जिल्लाका धेरै सामुदायीक वनमा कतै सामुदायीक वनकै पदाधिकारी त कतै काठ तस्करहरुद्धारा अवैध वन फडानी र काठ कटान भैरहेको पाईएको छ ।
सोही क्रममा बाँकेको डुडुवा गाउँपालिका–१ हजरात सामुदायिक वनमा अवैधरुपमा कटान गरिएको ५० दशमलव १० क्यूफिट वेवारिसे काठ प्रहरीले बरामद गरेको छ ।

सामुदायिक वन उपभोक्ता समूहका पदाधिकारी, वन डिभिजन कार्यालयका कर्मचारी र खडैचा प्रहरी चौकीबाट खटिएको प्रहरीको टोलीले वनमा गस्ति गर्नेक्रममा तस्करी गर्ने उदेश्यले राखिएको उक्त काठ फेला पारेको थियो ।
प्रहरीले बरामद गरेको काठ हजरात सामुदायिक वनका पदाधिकारीलाई बुझाएको प्रहरीले जनाएको छ ।