समाचारदाता
नेपालगन्ज, जेठ ३० । बाँके युनेस्को क्लब र बर्दिया मधुवन नगरपालिकाको संयुक्त आयोजना तथा प्लान इन्टरनेशनल नेपालको साझेदारीमा मानव बेचबिखन तथा ओसारपसार नियन्त्रणमा सरोकारवालाहरूको भूमिका सम्बन्धी अन्तरक्रिया कार्यक्रम सफलतापूर्वक सम्पन्न भएको छ ।
क्लबद्धारा सञ्चालन गरिएको सुरक्षा परियोजना अन्तर्गत सो अन्तरक्रिया आयोजना गरिएको हो ।
कार्यक्रममा मधुवन नगरपालिकाका उपमेयर अनिता चौधरी, वडाध्यक्षहरू, विषयगत शाखा प्रमुखहरू, कार्यपालिका सदस्यहरू, इलाका प्रहरी कार्यालय र सशस्त्र प्रहरी बलका प्रतिनिधि सहित २५ जनाको सहभागीता रहेको बाँके युनेस्को क्लबका कार्यक्रम संयोजक ईश्वर बिकले बताउनुभयो ।
कार्यक्रमको समापन गर्दै उपमेयर चौधरीले मानव बेचबिखन विरुद्धको अभियानमा बाँके युनेस्को क्लबको सक्रियताको प्रशंसा गर्दै सबै सरोकारवालाहरू मिलेर सामूहिक रुपमा अगाडि बढ्नुपर्नेमा जोड दिनुभयो ।
कार्यक्रमको सञ्चालन महिला तथा बालबालिका शाखाकी शोभा शर्माले गर्नुभएको थियो भने महिला तथा बालबालिका शाखाकी प्रमुख इन्द्रा चुनाराले नगरपालिकाले अहिलेसम्म गरेका प्रमुख उपलब्धिहरूको प्रस्तुतिका साथै सहभागीहरूलाई जानकारी गराउनुभएको थियो ।
कार्यक्रममा बाँके युनेस्को क्लबका कार्यक्रम संयोजक ईश्वर बिकले सहजीकरण गर्दै मानव बेचबिखन तथा ओसारपसार नियन्त्रणमा स्थानीय सरकारहरूको भूमिका विषयक छलफल चलाउनु भएको थियो ।
उहाँले मानव बेचबिखन के हो ? किन मानव बेचबिखन हुन्छ ? मानव बेचबिखन र ओसारपसारका कारणहरू, मानव बेचबिखन न्यूनीकरणमा जिम्मेवार निकायहरूको भूमिका, घटना व्यवस्थापनका लागि आवश्यक आधारभूत तत्वहरू, घटना व्यवस्थापनका विशेषता र सिद्धान्तहरू र घटना व्यवस्थापन प्रक्रियाका बारेमा बिस्तृत जानकारी गराउनुभएको थियो ।
बाँके युनेस्को क्लबकी फील्ड सुपरभाइजर सबित्रा भट्टले कार्यक्रमको व्यवस्थापनमा सहयोग गर्नु भएको थियो ।