पेशागत स्वास्थ्य तथा सुरक्षा परामर्श सेवाको आवधिक समिक्षा बैठक सम्पन्न
समाचारदाता
नेपालगन्ज, साउन १५ । भेरी वातावरणीय बिशिष्टिता समुह बि ग्रुपद्धारा ए.एफ.डि. र एम.डि.एम. फ्रान्सको सहयोगमा बाँकेमा सञ्चालित पेशागत तथा वातावरणीय स्वास्थ्य सहयोग परियोजनाको प्राविधिक सहयोगमा नेपालगन्ज उपमहानगरपालिकाले देशमै पहिलो पटक सरसफाईकर्मीहरूकालागि पेशागत स्वास्थ्य तथा सुरक्षा नीति मार्गदर्शन निर्देशिका तयार गरी राजपत्रमा प्रकाशन गरेको छ ।
यो कदम नेपालका अन्य पालिकाहरूकालागि पनि सराहनीय उदाहरण बन्न सक्ने सम्बन्धित सरोकारवालाले जनाएका छन् ।
सो नीति मार्गदर्शन कार्यान्वयनको लागि पालिका तथा वडास्तरीय समिति गठन गर्न बाँकी रहेको उपमहानगरपालिकाले जनाएको छ ।
विशेषगरी नेपालगन्ज उपमहानगरपालिकाद्धारा राजपत्रमा प्रकाशित स्वास्थ्य सम्बन्धि सो नीति मार्गदर्शनले अन्य पालिकाहरूलाई पनि सरसफाईकर्मी र किसानको सुरक्षाको दिशामा ठोस कदम चाल्न प्रेरणा दिने बिग्रुपले जनाएको छ ।
यसैविच पेशागत तथा वातावरणीय स्वास्थ्य सहयोग परियोजना अन्तर्गत पेशागत स्वास्थ्य तथा सुरक्षा परामर्श सेवाको आवधिक समिक्षा बैठक नेपालगन्जमा सम्पन्न भएको छ ।
स्वास्थ्य कार्यालय बाँकेका प्रमुख सुनिता पौडेलको अध्यक्षतामा सम्पन्न भएको सो बैठकमा परियोजनाका उपलब्धिहरू र आगामी सुधारका रणनीतिहरूमा विशेष छलफल गरिएको थियो ।
समिक्षा बैठकमा सहभागि अधिकांश सरोकारवालाहरुले छलफलका क्रममा स्वास्थ्य संस्थाहरूबाट प्रदान भइरहेको पेशागत स्वास्थ्य परामर्श सेवा अत्यन्तै उपयोगी र प्रभावकारी भईरहेको प्रतिक्रिया दिनुभयो ।
सोही अवसरमा स्वास्थ्य जाँच मात्र नभई कर्मचारीको काम गर्ने शैली, जोखिमको प्रकृति र वातावरणको वैज्ञानिक मूल्याङ्कन गर्नु अत्यावश्यक रहेकोमा सहभागिहरु सहमत देखिएको पेशागत तथा वातावरणीय स्वास्थ्य सहयोग परियोजनाका संयोजक समद सिद्दिकीले बताउनुभयो ।
सो बैठकमा स्वास्थ्य कार्यालय बाँकेका सूचना अधिकारी नरेश श्रेष्ठ, नेपालगन्ज उपमहानगर स्वास्थ्य महाशाखाका जागेश्वर बस्नेत, खजुरा स्वास्थ्य शाखाका शमसुद्दिन खाँ र डुडुवा स्वास्थ्य शाखाका सिताराम चौधरी लगायतले सरसफाईकर्मी र कृषकलाई नियमित पेशागत स्वास्थ्य परामर्श सेवा, स्वास्थ्य परीक्षण, तथा चेतना अभिवृद्धि कार्यक्रमहरू दिइँदै आएकोले स्वास्थ्य जोखिम कम हुँदै जाने संभावना देखिएको बताउनुभयो ।
बैठकमा एम डी एम फ्रान्सका कार्यक्रम प्रबन्धक तर्क बहादुर थापाले पेशागत स्वास्थ्य तथा सुरक्षा परामर्श सेवा अन्तर्गत गरिएका कामको सही समिक्षा गरेर देखिएका कमीकमजोरी सच्याउँदै जानुपर्ने बताउनुभयो ।
परियोजनाका स्वास्थ्य क्रियाक्लाप अधिकृत रुपक न्यौपानेले बैठकमा पेशागत परामर्श सेवाका क्रममा आएका प्रारम्भिक स्वास्थ्य समस्याका बारेमा तथ्यांकगत प्रस्तुतीकरण गर्नुभएको थियो ।
परियोजनामार्फत नेपालगन्ज उपमहानगरपालिकाको सहरी स्वास्थ्य प्रवद्र्धन केन्द्र, वडा नं. ४, मनिकापुर स्वास्थ्य चौकी वडा नं. २०, डुडुवा गाउँपालिका हिरमिनिया स्वास्थ्य चौकी, वडा नं. ६ र खजुरा गाउँपालिकाको सीतापुर स्वास्थ्य चौकी, वडा नं. २ बाट पेशागत स्वास्थ्य तथा सुरक्षा परामर्श सेवा सरसफाईकर्मी र कृषकहरुलाई प्रदान गरिंदै आएको छ ।
