सिराज खान
नेपालगन्ज, भदौ ७ । बर्दियाको राजापुर टपरा निवासी आकृति चौधरीको दिनचर्या अहिले पुरै फेरिएको छ । दिनभरी घर र खेतबारीको काम गरेर समय बिताउने चौधरी अहिले बिहानदेखि बेलुकासम्म सर्वसाधारणको दाँत उपचारका व्यस्त हुनुहुन्छ ।
विहान १० बजेदेखि बेलुका ६ बजेसम्म राजापुर–टपरामा रहेको टपरा डेन्टल क्लिनिकमा डा. दिपेश धमलासंगै दाँतका बिरामीको उपचार सहयोगमा अहिले चौधरीको समय बित्ने गरेको छ ।
बाँके युनेस्को क्लब र प्लान इन्टरनेशनल नेपालको साझेदारीमा बर्दियामा सञ्चालित पर्ल परियोजना अन्तर्गत आकृतिले तीन महिनाको डेन्टल चियर साइड सहायक तालिम लिएपछि उहाँको पेशागत जीवनको नयाँ अध्याय सुरु भएको हो ।
टपरा डेन्टल क्लिनिकमा सहायकका रूपमा ६ महिनाअघि मात्र काम सुरु गर्नु भएकी चौधरीले छोटो समयमै आफ्नो समर्पण, अनुशासन र आत्मविश्वासका कारण पेशागत दक्षता प्रदर्शन गर्न सक्षम भएको डा.धमलाले बताउनुभयो ।
आकृतिको यात्रा मात्र एउटा तालिम पछिको रोजगारीको कथा होइन, यो उनको जीवनमा आएको रूपान्तरण र सशक्तिकरणको वास्तविक उदाहरण पनि हो ।
“धेरै युवतीहरू अवसर र सीपको कमीले आत्मनिर्भर हुन नसक्ने परिस्थितिमा हुन्छन्, तर मैले सही अवसर र वातावरण पाए भने महिलाहरूले समाजमा ठूलो परिवर्तन ल्याउन सक्छन् भन्ने कु्रा गरेर देखाउन सफल भएँ ।”– आकृतिले भन्नुभयो,“मलाई दिएको अवसरले मेरो जीवनलाई नयाँ दिशातिर मोडेको छ । अब म आत्मनिर्भर भएकी छु, र अरू युवतीहरूले पनि आफ्नो सपना पछ्याउनुपर्छ भन्ने सन्देश दिन चाहन्छु ।”
तालिमपछि सुरु गरेको पेशागत जीवनले स्थानीय युवतीहरूलाई पनि प्रेरणा दिएको चौधरीको भनाई छ । उहाँले आफुले काम गर्ने क्लिनिकमा दैनिक पाँचदेखि दसजना दाँतका बिरामीहरु आउने गरेको जनाउँदै उनिहरको उपचारमा सहयोग गर्न पाउँदा निकै खुशी महसुस हुने बताउनुभयो ।
बाँके युनेस्को क्लबका अध्यक्ष प्रवेज अलि सिद्दिकीले आकृतिको सफलता पर्ल परियोजनाले ल्याउन खोजेको वास्तविक नतिजा भएको जनाउँदै युवाहरूलाई सीप विकासमार्फत रोजगारी र आत्मनिर्भरता तर्फ अघि बढाउने उद्देश्य परियोजनाको रहेको बताउनुभयो ।
उहाँले थप्नुभयो–“यसले देखाएको छ कि युवा र किशोरीमा लगानी गर्दा उनीहरू मात्र नभई सम्पूर्ण समुदाय लाभान्वित हुन्छ ।”
बाँके युनेस्को क्लबका उपनिर्देशक गोविन्द प्रसाद लमिछानेका अनुसार, आकृतिको सफलता केवल व्यक्तिगत उपलब्धि मात्र नभई, यो सम्पूर्ण समुदायको गर्व हो । यसले देखाउँछ कि जब युवतीहरूलाई अवसर दिइन्छ, तब उनीहरूले असम्भवलाई पनि सम्भव बनाउन सक्छन् ।