समाचारदाता
नेपालगन्ज, भदौ १४ । भेरी वातावरणीय विशिष्टता समूह बी ग्रुपले सरसफाईकर्मी र किसानलाई गाउँघरमै स्तरीय स्वास्थ्य सेवा सहज रुपमा उपलब्ध गराउन नेपालगन्ज २० मनिकापुर स्वास्थ्य चौकीलाई करिब आठ लाख रुपियाँको मेडिकल उपकरण हस्तान्तरण गरेको छ ।
एम.डी.एम.फ्रान्स र ए.एफ.डि.को आर्थीक सहयोगमा बी बी ग्रुपद्वारा संचालित ‘पेशागत तथा वातावरणीय स्वास्थ्य सहयोग परियोजना’ अन्तर्गत सो स्वास्थ्य चौकीलाई विभिन्न मेडिकल उपकरणसंगै स्वास्थ्य प्रयोगशालाका लागि आवश्यक पर्ने केमिकलसहित उपकरण हस्तान्तरण गरिएको हो ।
नेपालगन्ज उपमहानगरपालिकाका उपप्रमुख कमरुद्दीन राई र प्रमुख प्रशासकीय अधिकृत राम हरि शर्माले एक कार्यक्रमका बिच वडा अध्यक्षमार्फत मनिकापुर स्वास्थ्य चौकीलाई दुई लाख ३७ हजार ३२४ रुपियाँ बराबरको मेडिकल उपकरण र पाँच लाख ४४ हजार ९६० बराबरको प्रयोगशाला केमिकल, रि एजेन्ट तथा अन्य मेसिन उपकरणहरु हस्तान्तरण गर्नुभयो ।
सो अवसरमा वडा नम्बर २० का वडा अध्यक्ष कौशल कुमार धोबी, मनिकापुर स्वास्थ्य चौकी प्रमुख प्रकाश श्रेष्ठ र स्वास्थ्य महाशाखाका राजन शाही, ‘पेशागत तथा वातावरणीय स्वास्थ्य सहयोग परियोजना’ का संयोजक समद सिद्दिकी, स्वास्थ्य अधिकृत रुपक न्यौपाने एवं स्वास्थ्य सामुदायिक परिचालक महेश चन्द लगायतको उपस्थिति रहेको थियो ।
नेपालगन्ज उपमहानगरपालिका वडा नम्बर २० का वडा अध्यक्ष कौशल कुमार धोबीले परियोजनासंग मनिकापुर स्वास्थ्य चौकीमा प्रयोगशाला स्थापना गर्न सहयोग माग गरेकोले परियोजनाले नेपालगन्ज उपमहानगरपालिकाको सहकार्यमा स्वास्थ्य संस्था मुल्यांकन गरि प्रयोगशाला स्थापना गर्नकालागि लामो समय पैरवी र लबिङ्ग गरि उपमहानगरपालिकाको कार्यपालिका बैठकबाट प्रयोगशाला स्थापना गर्न निर्णय गराईएको परियोजना संयोजक सिद्दिकीले बताउनुभयो ।
एम.डी.एम.फ्रान्स र ए.एफ.डि.को आर्थीक सहयोगमा ‘पेशागत तथा वातावरणीय स्वास्थ्य सहयोग परियोजना’ बाँकेको नेपालगन्ज उपमहानगरपालिका, डुडुवा गाउँपालिका र खजुरा गाउँपालिकामा संचालन भईरहेको छ ।
उक्त परियोजनाले सरसफाईकर्मीहरुको पेशागत स्वास्थ्यलाई सुधार र वातावरणीय जोखिमलाई न्यूनीकरण गर्ने काम गर्दै आइरहेको छ ।
परियोजनाको उदेश्य स्वास्थ्य संस्थाहरुलाई पेशागत स्वास्थ्य र अन्य स्वास्थ्य सेवा प्रवाह गर्न सजिलो र बलियो बनाउनु रहेकोले निरन्तर स्वास्थ्य संस्थाहरुलाई सहयोग गर्दै आइरहेको परियोजना संयोजक सिद्दिकीले बताउनुभयो ।
उहाँका अनुसार सोही सहयोगले गर्दा परियोजना संचालन भइरहेका पालिकाहरुका सरसफाईकर्मी र कृषकहरुले निशुल्क सेवाहरु पाइरहेको हुँदा उहाँहरुले परियोजनाप्रति आभार ब्यक्त गर्नु भएको छ ।