एअरपोर्ट रोड राँझामा अर्गानिक तरकारी बिक्रि गरिंदैछ
समाचारदाता
नेपालगन्ज, मङ्सिर ८ । पेशागत तथा वातावारणीय स्वास्थ्य सहयोग परियोजना अन्तर्गत प्रांगारिक तरकारी उत्पादन र उपभोग प्रबर्धनकालागि नेपालगन्जमा ६ दिने अभियान संचालन गरिएको छ ।
एम.डी.एम.फ्रान्स र ए.एफ.डि.को आर्थीक सहयोगमा भेरी वातावरणीय विशिष्टता समूह बी ग्रुपले सञ्चालन गरेको पेशागत तथा वातावारणीय स्वास्थ्य सहयोग परियोजना अन्तर्गत उक्त अभियान संचालन गरिएको हो ।
सो अभियान अन्तर्गत नेपालगन्ज उपमहानगरपालिकाको राँझा एयरपोर्ट रोडस्थित एकीकृत प्रांगारिक तरकारी संकलन तथा बिक्रि केन्द्रमा ६ दिनदेखि विषादीरहित, ताजा र प्रयोगशालामा परीक्षण गरिएका प्रांगारिक तरकारी बिहान ८ देखि बेलुका ६ बजेसम्म उचित मुल्यमा बिक्रि भइरहेको छ ।
उक्त तरकारी बजारलाई निरन्तरता दिन श्री साथि स्वावलम्बन बहुउद्धेश्यीय कृषि सहकरीलाई जिम्मा दिईएको जनाईएको छ । सो बजार संचालनमा आवश्यक सहयोग परे नेपालगन्ज वडा नम्बर २० को वडा कार्यालय लगायत नेपालगंजको कृषि शाखाले सहयोग प्रदान गर्ने प्रतिबद्धता जनाएको छ ।
स्थानीय किसानले घरघरघमा उत्पादन गरेको आर्गेनिक तरकारीको ल्याब जांच गराई सुरक्षित तरकारी बजारमा बिक्रिका लागि ल्याईएको हो ।
परियोजनाले सन् २०२२ देखि कृषि क्षेत्रमा कृषकहरुको स्वास्थ्य र प्रांगारिक तरकारी प्रबर्धनमा विभिन्न क्रियाकलापहरु गर्दै आईरहेको छ सो अन्तर्गत यस्ता प्रबर्धन अभियानहरु पनि बेला बेलामा संचालन हुँदै आएका छन् ।
सो ६ दिने अभियानको उदघाटन समारोहमा नेपालगन्ज उपमहानगरपालिका २० का वडा अध्यक्ष कौशलकुमार धोबीले वडाले यो बजार निर्माणमा वडाको पाँच लाख र परियोजनाको १० लाख भन्दा बढीको लगानी भएको हुँदा यस बजारलाई नियमितता दिन हर प्रकारको आवश्यक सहयोग प्रदान गर्ने प्रतिबद्ता व्यक्त गर्नुभयो ।
परियोजनाले तयार पारेको ३०० जना भन्दा बढी कृषकहले एकीकृत शत्रु जीव व्यवस्थापन प्रणालीलाई अभ्यास गरि रहेको कारणले नै जांच परिक्षण पास भई उपभोग योग्य तरकारी बिक्रिमा आएको पेशागत तथा वातावारणीय स्वास्थ्य सहयोग परियोजनो जनाएको छ ।