समाचारदाता
नेपालगन्ज, माघ २५ । नेपालगन्जका चर्चित युवा व्यवसायी दिपेन्द्र बिष्ट बाँके क्षेत्र नं २ का प्रतिनिधि सभा सदस्य पदका उम्मेदवार तथा नेपाली कम्युनिस्ट पार्टीका युवा नेता हुनुहुन्छ । युवा जोस, कर्मशील सोच र जनमुखी व्यवहारका कारण उहाँ पछिल्लो समय जिल्लाका युवाहरुमा सर्वाधिक लोकप्रिय व्यक्तित्वका रूपमा परिचित हुनुहन्छ ।
उहाँ केवल राजनीतिमा सीमित व्यक्ति होइनन्, सफल व्यवसायीका रूपमा पनि परिचित हुनुहुन्छ। आफ्नै पहल र मेहनतबाट सानो उमेरमै व्यवसाय सञ्चालन गर्दै उहाँले हालसम्म ५० भन्दा बढी व्यक्तिलाई प्रत्यक्ष रोजगारी प्रदान गरिसक्नुभएको छ। यसले उहाँको नेतृत्व क्षमतासँगै सामाजिक उत्तरदायित्वको स्पष्ट प्रमाण प्रस्तुत गर्छ।खेलकुद क्षेत्रमा सक्रिय रहँदै आउनुभएका बिष्ट युवालाई अनुशासन, आत्मविश्वास र सकारात्मक सोचतर्फ डोर्याउने अभियानमा निरन्तर लागिरहनुभएको छ। खेलकुदमार्फत युवालाई कुलत र निराशाबाट जोगाउँदै समाज निर्माणमा जोड्ने उहाँको प्रयासलाई स्थानीय स्तरमा उच्च सम्मानका साथ हेरिन्छ।
समाजसेवामा समेत अग्रसर बिष्टले शिक्षा, स्वास्थ्य, रोजगारी र पूर्वाधार विकासलाई आफ्नो प्रमुख एजेन्डा बनाउँदै आउनुभएको छ। टोल–टोलमा पुगेर जनताको समस्या सुन्ने, सुझाव संकलन गर्ने र समाधानका लागि प्रतिबद्धता व्यक्त गर्ने उहाँको शैलीले उहाँलाई “सुन्ने नेता” को पहिचान दिलाएको छ।मिलनसार स्वभाव, सरल जीवनशैली र प्रश्नको जवाफ दिन कहिल्यै नझर्किने व्यवहार उहाँको विशेषता हो। ज्येष्ठ नागरिकदेखि युवासम्म, मजदुरदेखि व्यवसायीसम्म सबैसँग सहज रूपमा घुलमिल हुन सक्ने क्षमता उहाँको ठूलो शक्ति मानिन्छ।
दिपेन्द्र बिष्ट विकास भाषणले होइन, कामले सम्भव हुन्छ भन्ने मान्यतामा विश्वास राख्नुहुन्छ। भौतिक विकाससँगै मानवीय संवेदना, सामाजिक न्याय र समान अवसरको पक्षमा उभिनु उहाँको राजनीतिक दर्शन हो।
अहिले उहाँ गाउँ गाउँ र टोल टोलमा पुगेर जनताका समस्या सुन्ने र ती समस्यालाई आफ्नो डायरीमा नोट गर्ने कार्यमा व्यस्त हुनुहन्छ । उहाँले जनतासंग संवाद गर्दा आफुलाई नेता होइन सेवक र सबैको कुरा सुन्ने र समस्या समाधान गर्ने एउटा मानिस मात्र मान्न आग्रह गरिरहनुभएको छ । वडा वडामा कार्यालय स्थापना मार्फत उहाँले दरिलो उपस्थिति पनि बनाउँदै लग्नु भएको छ ।