समाचारदाता
नेपालगन्ज, भदौ १४ । भेरी वातावरणीय विशिष्टता समूह बी ग्रुपद्वारा समुदायमा सरसफाई सम्बन्धि चेतना फैलाउने उदेश्यले नेपालगन्ज उपमहानगरपालिका २ बाल्मिकि टोलमा प्रवद्र्धनकालागि सरसफाई तथा सचेतना अभियान कार्यक्रम सम्पन्न गरिएको छ ।
एम.डी.एम.फ्रान्स र ए.एफ.डि.को आर्थीक सहयोगमा बी ग्रुपद्वारा संचालित ‘पेशागत तथा वातावरणीय स्वास्थ्य सहयोग परियोजना’ बाँकेले क्लिन नेपालगन्ज, ग्रीन नेपालगन्ज तथा बाल्मिकी समाजको सहकार्यमा ३ आर (कम उत्पादन, पुनः प्रयोग र पुनः चक्रण) प्रवद्र्धनका लागि सरसफाई तथा सचेतना अभियान कार्यक्रम आयोजना गरेको हो ।
बी ग्रुपका उपाध्यक्ष मीरा खनालको अध्यक्षतामा सम्पन्न भएको सो कार्यक्रममा नेपालगन्ज उपमहानगरपालिकाका मेयर प्रशान्त विष्टले बाल्मिकी समाजले नेपालगन्जको सरसफाईमा आफ्नो स्वास्थ्यलाइ पनि जोखिममा राखी निरन्तर योगदान पुरयाई रहेको जनाउँदै यस परियोजनाले सरसफाईकर्मीहरुको स्वास्थ्य र सुरक्षालाइ मध्यनजर गरि विभिन्न क्रियाकलाप गर्दै आइरहेकोमा खुशी व्यक्त गर्नुभयो ।
उहाँले यो परियोजनाले नेपालगन्ज अन्तर्गतका स्वास्थ्य संस्थाहरुलाई निरन्तर सहयोग गरिरहेको उल्लेख गर्दै उपमहानगरपालिकाको सरसफाई र स्वच्छतालाई प्रबर्धन गर्न यस्ता सरसफाई अभियान समेत संचालन गरिरहेको हुँदा आम नागरिकमा सचेतना बढ्नुकासाथै बाल्मिकी समाजमा पनि व्यवहार परिवर्तन हुने जनाउँदै बी ग्रुप र एम.डी.एम. फ्रान्सलाई धन्यवाद दिनुभयो ।
क्लिन नेपालगन्ज, ग्रीन नेपालगन्जका संस्थापक डाक्टर बिनोद कर्णले नेपालगन्जलाई भागोलिक रूपमा अन्य पहाडी जिल्ला जस्तै पोखरासंग तुलना नगर्न आग्रह गर्नु भयो ।
उहाँले पहाडी भेगमा सरसफाई गर्न ठुलो चुनौती न रहेको तर नेपालगन्ज तराई भएकोले यहाँ सरसफाई गर्न ठुलो चुनौती रहेको हुँदा, सम्पूर्ण नागरिक यस विषयमा गम्भीर भएर फोहोर व्यवस्थापन सहि तरीकाले गर्नुका साथै जथाभावी विसर्जन गर्ने कार्य बन्द गर्नु पर्नेमा जोड दिनुभयो ।
सो बारेमा नेपालगन्ज उपमहानगरपालिकाले पनि खासै चासो र प्रयास नगरेको पाईएको जनाउँदै डा. कर्णले बी ग्रुप र एम.डी.एम.फ्रान्स जस्ता संस्थाहरुले यस क्षेत्रमा ठुलो योगदान पुरयाईरहेको हुँदा धन्यवाद दिंदै बाल्मिकी समाजलाइ पनि सरसफाईका साथै स्वास्थ्यमा ध्यान दिंदै सुरक्षित अभ्यासहरु अपनाउन आग्रह गर्नुभयो ।
कार्यक्रममा स्वास्थ्य र सरसफाईकालागि नेपालगन्ज उपमहानगरपालिकाले गरेको अभ्यास र क्रियाकलापहरुको जानकारी दिंदै स्वास्थ्य महाशाखाका प्रमुख राम बहादुर चन्द र वातावरण तथा सरसफाई शाखाका इन्जिनियर प्रकाश डीसिले आफ्नो मन्तब्य राख्नु भएको थियो ।
सोही कार्यक्रममा बी ग्रुप र एम.डी.एम.फ्रान्सको सहयोगमा ३–३ ओटा डस्ट बिन भएको दुइ ठाउँमा फोहोर फाल्ने ठाउँ निर्धारण गरिएको छ भने सार्वजनिक सचेतनाका लागि बिपी चौक र राँझा एरपोर्ट नजिक होर्डिंग पनि राखिएका छन् ।
सो कार्यक्रममा नेपालगन्ज उपमहानगरपालिका वडा नम्बर २ का वडा अध्यक्ष मनोज कुमार श्रेष्ठ, जिल्ला प्रशाशन कार्यालय बाँके प्रशासकिय अधिकृत बिस्नु सहनी, नेपालगन्ज उपमहानगरपालिकाको कार्यपालिका संयोजक मुजम्मिल हलवाई, सदस्य बसन्त कनौजिया, बाल्मिकी समाजका अध्यक्ष जगदीश बाल्मिकी लगायत सहभागी हुनुहुन्थ्यो । कार्यक्रम सञ्चालन ओबिराज आचार्यले गर्नु भएको थियो ।
सो अभियानको उद्देश्य नागरिकमा सरसफाईप्रति जनचेतना जगाउँदै प्रभावकारी नीति र योजनाहरू विकास गरेर फोहोर व्यवस्थापन प्रणालीलाई सुदृढ पार्नुका साथै ३ आरलाई प्रवद्र्धन गर्नु रहेको ‘पेशागत तथा वातावरणीय स्वास्थ्य सहयोग परियोजना’ का संयोजक समद सिद्दिकीले बताउनुभयो ।
