समाचारदाता
नेपालगन्ज, मंसिर १२ । युनेस्को काठमाडौँका नेपाल प्रतिनिधि जाको डु टोइत नेतृत्वको टोलीले बाँके युनेस्को क्लबको कार्यालय तथा विभिन्न कार्यक्रम क्षेत्रहरूको विस्तृत अनुगमन तथा अन्तरक्रिया भ्रमण सम्पन्न गरेको छ ।
भ्रमणको क्रममा टोलीले क्लबको व्यवस्थापन टोली, परियोजना कर्मचारी तथा समुदायस्तरका लाभग्राहीहरूसँग विस्तृत छलफल गरेको थियो ।
क्लबको कार्यालयमा भएको अन्तरक्रिया बैठकमा क्लबका टेक्निकल एड्भाइजर साजिद अली सिद्दीकीले संस्थाको इतिहास, संगठनात्मक संरचना, कार्यक्रमका मुख्य क्षेत्रहरू तथा चलिरहेका परियोजनाहरूको बारेमा जानकारी गराउनुभयो ।
उहाँले क्लबद्वारा सञ्चालित कार्यक्रमहरूले बालबालिका, युवा महिला, युवा र विपन्न समुदायको जीवनमा ल्याइरहेको सकारात्मक, दिगो र समावेशी परिवर्तनका बारेमा पनि बिस्तृत जानकारी गराउनुभयो ।
फिल्ड मिसनअन्तर्गत सो टोलीले नेपालगन्जस्थित बरकातीया मदरसा लगायत क्लबद्वारा सहयोग प्राप्त धार्मिक विद्यालयको भ्रमण गर्यो । विद्यालयमा प्रदान गरिएका फर्निचर, कार्पेट, पंखा, पानी कुलर लगायतका शैक्षिक सामग्रीको प्रभावका बारेमा टोलीलाई जानकारी गराईएको थियो ।
जाको डु टोइटले कक्षा अवलोकन गर्दै विद्यार्थी र विद्यालय व्यवस्थापनसँग संवाद पनि गर्नुभयो । उहाँले मुस्लिम छोराछोरीलाई धार्मिकसहित आधुनिक शिक्षा प्रदान गरिरहेको विद्यालय र क्लबको सहयोगप्रति उच्च प्रशंसा व्यक्त गर्नुभयो ।
सोही प्रकारले टोलीले बर्दियामा रहेका किशोरी क्लबका सदस्यहरूसँग भेटघाट गर्दा किशोरीहरूले बालविवाह, घरेलु हिंसा, मानव बेचबिखन तथा हानिकारक परम्परागत प्रथाहरू रोक्न क्लबको भूमिकाबारे जानकारी गराएका थिए ।
त्यसैगरी, उनिहरुले महिनावारी स्वास्थ्य, यौनजन्य रोग तथा सर्वाइकल क्यान्सर जोखिमबारे समुदायमध्ये सचेतना फैलाइरहेको अनुभव पनि सुनाएका थिए ।
टोलीले सम्भूसरण माध्यमिक विद्यालयमा क्लबर प्लान इन्टरनेशनल नेपालको सहयोगमा स्थापना गरिएको विज्ञान प्रयोगशाला अवलोकन गर्यो । प्रधानाध्यापकले प्रयोगशालाले विद्यार्थीको व्यावहारिक सीप र विज्ञान सिकाइमा ल्याएको सुधारबारे जानकारी दिए ।
त्यसपछि टोलीले नेपाल राष्ट्रिय माध्यमिक विद्यालय, दोदारीको भ्रमण गर्यो, जहाँ बहिरा बालबालिकाका लागि सांकेतिक भाषामा सिकाइ प्रदान गरिन्छ । विद्यालयमा क्लबले प्रदान गरेका फर्निचर र एलसिडि स्क्रीनले सिकाइ वातावरण अझ प्रभावकारी बनेको विद्यालयले जानकारी गरायो ।
राजापुरस्थित भेरी माध्यमिक विद्यालयमा निर्माण गरिएको नयाँ बाल विकास कक्षा निरीक्षणका क्रममा शिक्षकहरूले सुधारिएको कक्षाले सिकाइमा ल्याएको सकारात्मक असरबारे जानकारी दिएका थिए ।
त्यसपछि टोलीले युवा महिलाहरूको बाँस हस्तकला उद्यम र वर्मी–कम्पोस्ट उत्पादन उद्यमको अवलोकन गर्यो । उद्यमी महिलाहरूले सीप विकास तथा आम्दानीका अवसरहरूले आफूहरूलाई आत्मनिर्भर, आर्थिक रूपमा सुरक्षित र परिवार–समुदायमा सम्मानित बनाएको बताए ।
अन्तिम चरणमा टोलीले टाइगर भिल्ला रिसोर्टमा पुगेर बाँके युनेस्को क्लबका कर्मचारीहरू सहभागी प्रशिक्षण अवलोकन गर्यो ।
समापन मन्तव्य व्यक्त गर्दै जाको डु टोइतले क्बलका कार्यक्रमहरू समावेशी, दिगो र समुदायमैत्री परिवर्तनका उत्कृष्ट उदाहरण रहेको भन्दै उच्च प्रशंसा गर्नुभयो ।