समाचारदाता
नेपालगन्ज, २७ मंसिर । बाँके युनेस्को क्लबले पाँच वर्षे संगठनात्मक रणनीति योजना निर्माण गर्ने उद्देश्यसहित पाँचदिने संगठनात्मक रणनीति कार्यशाला सफलतापूर्वक सम्पन्न गरेको छ ।
बर्दियाको ठाकुरद्धारामा सम्पन्न भएको सो कार्यशालाको उदघाटन सत्रमा बोल्दै बाँके युनेस्को क्लबका अध्यक्ष परवेज अली सिद्दीकीले पाँच वर्षे रणनीतिक योजनाको महत्वबारे प्रकाश पार्नुभयो । उहाँले यो योजना केवल कागजी दस्तावेज मात्र नभई संस्थाको दीर्घकालीन दृष्टि, सामाजिक रूपान्तरण र समावेशी विकासको मार्गनिर्देशक दस्तावेज हुने प्रष्ट पार्नुभयो ।
क्लबका अनुसार सो कार्यशालाको मुख्य उद्देश्य प्रभावकारी सेवा प्रवाहलाई थप सुदृढ बनाउँदै विपन्न बालबालिका, सीमान्तकृत समुदाय, पिछडिएका तथा सामाजिक रूपमा उत्पीडित वर्ग, युवा महिला र युवाहरूको जीवनमा सकारात्मक र दिगो परिवर्तन ल्याउने दूरदर्शी पाँच वर्षे रणनीतिक योजना तयार गर्नु रहेको थियो ।
सो रणनीतिले वातावरण संरक्षण, जलवायु परिवर्तन तथा विश्वव्यापी तापवृद्धिका असर न्यूनीकरण गर्ने दिगो पहलहरूलाई पनि प्राथमिकतामा राखेको जनाईएको छ ।
कार्यशालामा कार्यसमिति सदस्य तथा परियोजना कर्मचारी गरी ३५ जनाको सहभागीता रहेको थियो । क्लबका कार्यकारी निर्देशक रवि तुलाधरका अनुसार पाँच दिनसम्म सहभागीहरूले संस्थागत अवस्था विश्लेषण, विद्यमान चुनौती पहिचान, रणनीतिक प्राथमिकता निर्धारण तथा आगामी पाँच वर्षका स्पष्ट कार्यदिशा तय गर्न गहन छलफल, समूहकार्य र मन्थन गरेका थिए ।
सहभागीहरूको उत्साहपूर्ण र सक्रिय सहभागिताले कार्यशालालाई सफल बनाएको क्लबले जनाएको छ । कार्यशालाबाट संस्थाको दृष्टि, लक्ष्य, रणनीतिक उद्देश्य र प्रमुख परिणाम क्षेत्रहरू समेटिएको बलियो, व्यवहारिक र भविष्यदृष्टि युक्त पाँच वर्षे रणनीतिक योजना मस्यौदा तयार भएको अध्यक्ष सिद्दिकीले बताउनुभयो ।
कार्यशालाको सहजीकरण बिनय दिल लामाले गर्नु भएको थियो । उहाँले संरचित, अन्तरक्रियात्मक र समग्र ढंगले सत्रहरू सञ्चालन गर्दै सहभागीहरूलाई गहिरो चिन्तन, प्रभावकारी योगदान र साझा दृष्टि निर्माणमा सहयोग पुरयाउनु भएको थियो ।
बाँके युनेस्को क्लबकी वरिष्ठ उपाध्यक्ष पंचम गुरुङको अध्यक्षतामा भएको कार्यशालाको समापन सत्रमा विशेष अतिथिका रूपमा क्लबका अध्यक्ष सिद्दीकी तथा कार्यकारी निर्देशक तुलाधर रहनुभएको थियो । अन्य अतिथिहरूमा सहजकर्ताहरु बिनय दिल लामा र विवेक नेपाल रहनुभएको थियो ।
सहभागीहरूको तर्फबाट बोल्दै भगवती बि.के.ले कार्यशालालाई अत्यन्तै फलदायी र रणनीतिक योजना सम्बन्धी गहिरो ज्ञान हासिल गर्ने अवसरका रूपमा रहेको बताउनुभयो ।
सोही प्रकारको क्लबका प्राविधिक सल्लाहकार साजिद अली सिद्दीकीले रणनीतिक योजनाले प्रभावकारी सेवा प्रवाह र समग्र सामाजिक विकासका लागि स्पष्ट रोडम्याप प्रदान गर्ने विश्वास व्यक्त गर्नुभयो ।